बंडखोर कथा की सूडकथा...

हाणामारी व जाळपोळीच्या दृष्यांनी सजलेली कथा, असं ज्याचं सार्थ वर्णन करता येईल तो चित्रपट म्हणजे, "सत्यमेव जयते..."

पोलीस गोटातल्या काही भ्रष्ट अधिकाऱ्यांना संपवण्याचा विडा उचललेला एक तरूण (जॉन एब्राहम) आणि त्याच्या विरुद्ध उभा ठाकलेला कर्तव्यदक्ष व इमानदार पोलीस अधिकारी (मनोज बाजपायी) यांच्यामधल्या संघर्षाची ही कथा. असंख्य हाणामारीची दृष्य, जाळपोळ, गाड्यांचे स्फोट, आयटम साँग, नायकाचं एकाच वेळी चार-पाच जणांना मारणं, नायिकेसोबत प्रणय-द्वंद्वगीत गात फिरणं अशा एकेकाळच्या मसाला चित्रपटांच्या लोकप्रिय घटकांचा यात भरणा केला गेला आहे...

कमकुवत कथेला तितक्याच कमकुवत पटकथेची व संगीताची जोड मिळाल्याने चित्रपट पकड घेत नाही. नवतारका आयेशा शर्मा यांचा वावर आणि कपडेपट चांगले आहेत पण अदाकारी व संवादफेक यांमध्ये मात्र त्यांनी निराश केलं. अमृता खानविलकर यांनी त्यांच्या छोट्याशा भूमिकेत छान रंग भरलेत. हिंदी-मराठी मालिकांमधून अत्यंत लोकप्रिय झालेल्या काही कलाकारांनीही या चित्रपटात आपलं कसब दाखवलं आहे. पण चित्रपट ज्यामुळे लक्षात राहू शकेल अशा फक्त दोनच गोष्टी आहेत. एक म्हणजे जॉन एब्राहम व मनोज बाजपायी यांच्यातली शाब्दीक द्वंद्व दृष्य आणि दुसरं म्हणजे या दोघांची अदाकारी...

चित्रपटातले दोन प्रसंग जरासे खटकले. तीन खून होतात. त्या ठिकाणच्या नावांची पहिली अक्षरं एकमेकांशी जुळवून, तो अज्ञात खूनी कुठल्या मार्गाने चाललाय आणि पुढचा खून कुठे होणार हे इंस्पेक्टर सहज शोधून काढतो. मिळालेल्या पहिल्या तीन अक्षरांच्या आधारे पोलीस यंत्रणेशी जोडलेले अनेक शब्द बनू शकतात. पण इंस्पेक्टर मात्र ते दोन शब्द धरूनच तपास पुढे नेतो. दुसरा प्रसंग म्हणजे खुन्यापासून वाचावं म्हणून काही पोलीस अधिकारी एकाच जाग एकत्र येऊन राहतात. हे दृष्य पोलीस खात्याला बदनाम करणारं आहे असं मला वाटतं...

मुख्य नायक असल्याने जॉन एब्राहमला चित्रपटात भरपूर वाव मिळालाय. पण सहनायक मनोज बाजपाईला एखाद-दुसरी गोळी झाडणे आणि संवाद, याखेरीज अजून काहीच काम दिलेलं दिसत नाही. कार्यप्रणाली आणि भ्रष्ट पोलीस अधिकारी यांच्यावर चिडलेला सामान्य माणूस पेटून उठतो आणि त्यांचे खून करतो हा कथाभाग शेवटी शेवटी सूडनाट्यात बदलत जातो. सूडकथे ऐवजी जर बंडखोरकथाच ठेवली असती तर कदाचित परिणा वेगळा झाला असता...

बराच काळ मसाला चित्रपटांनी हजेरी न लावल्याने या चित्रपटाचा घाट घातला असावा, असं चित्रपट पाहताना वाटतं. एकंदरीत one time watch या पठडीत मोडणारा, "सत्यमेव जयते", मसाला चित्रपटांच्या शौकीनांसाठी परवणीच आहे असं म्हटलं तरी हरकत नाही. आता "सत्यमेव जयते २" येऊ घातला आहे. येणारा हा चित्रपट, "सत्यमेव जयतेचा सीक्वल आहे, की यात नवीन काही असेल, हे तर चित्रपट प्रदर्शित झाल्यावरच समजेल...

@ अनिकेत परशुराम आपटे.