"लग्नाची व्हिडियो काशेट..." अशी ज्या शिणुमाची ओळक होती किंवा आहे, तो पिच्चर म्हन्जे "हम आपके है कौन..!!"
दुसरा मोठा बंगला. प्रोफेसर सिद्धांत चौधरी (अनुपम खेर), त्यांची पत्नी मधुकला (रीमा लागू), साधी सरळ पूजा (रेणुका शहाणे-राणा) आणि नटखट निशा (माधुरी दिक्षीत-नेने). ही आपोझिट पार्टी. त्यांचा नातेवाईक म्हणजे मधुकलाचा भाचा, शकुंतला शोधक भोला प्रसाद (दिलीप जोशी). इथे नो फ्रँड लिश्ट. हा शॉर्ट बट स्वीट परिवार म्हणजे लड़कीवाले. हुश्श... झाली यकदाची ओळख परेड...
ऑफिसिया राजेशचं लग्न साध्या सरळ पूजाशी ठरतं आणि लग्नाच्या काशेटला जी सुरुवात होते ती थेट दि यंडची पाटी येईपर्यंत. या काशेटमंदी कैलाशनाथचे दोन्हीही दिवटे आणि सिद्धांत चौधरीच्या दोन्ही कार्ट्या बोहल्यावर चढून घेतात. झालंच तर आपल्यासोबत लल्लू प्रसाद-चमेली आणि भोला प्रसाद-रीटा या जोडगोळ्यांनाही लगीन सपन दाखवतात...
गानी... जाम भारी...
मूझिक... लई भारी...
याक्टिंग... यकदम भारी...
आता माझ्या शंकांची बारी...
स्थळ - लग्नघर, दुसरा मोठा बंगला. करवली म्हणून नटलेली निशा इकडे-तिकडे बागडताना दिसते. मी आजवर जितकी लग्न अटेंड केली, त्यानुसार करवलीला, म्हणजे मुलाच्या किंवा मुलीच्या बहिणीला मोप कामं असत्यात. आनी हितं ही बया, म्हन्जी निशाबाई हो... कोड्रिक्सचे घोट घेत टेबल खाली आरामात पसरलेली असते... काय म्हनावं या करवली बायला...!!!
स्थळ - पहिला मोठा बंगला. "धिकताना धिकताना..." गाणं सुरू असतं. ऑफिसिया राजेश ब्याग पकडून खोलीत येतो. बच्चों की डॉक्टर रज़िया सांगते, "तुझी बायडी पोटूशी हाय..." मी काय म्हनतो, तो राजेश यवडा सुजान नागरिक, पर तेला आदी कसं कललं न्हाय याबद्दल...!!!
स्थळ - दुसरा बंगला. सिद्धांत चौधरी मधुकलाशी राजेश आणि निशाच्या लग्नाविषयी बोलत असतात. निशाचं लग्न... यवडंच काय ती निशा ऐकते आनी समजातल्या गैरामुळे ती आनंदते. डायरेक्ट लग्नाच्या आदल्या दिवशी हातात आलेल्या पत्रिकेमुळे निशाला समजतं, की प्रेम स्टेशनपर जानेवाली गाड़ी अब राजेश स्टेशपर रुकेगी... नाही म्हणजे जिचं लगीन हाय, तिला म्हाईतच न्हाय तिचा दादला कोन...!!!
स्थळ - हास्पिटल. राजेशची बायडी बाळतीन होऊन तीच पोरगा होतो. आनी हे सांगायला अखंड डाक्टर ओ.टी.भाईर येतो. हे तर काय बी न्हाय... खुश झालेला प्रेम काका त्या डाक्टरला टेबलवर उभी करतो, लिबर्टीवाल्या पुतळ्यासारखी... हे कस्काय...!!!
प्रसंग - "माये नि माये...", "दीदी तेरा देवर दिवाना..." ही गाणी, ज्यात प्रेमचं निशासोबत नाचणं; पासिंग द पार्सल हा खेळ, ज्यात निशाचं प्रेमजवळ बसणं, त्याच्या पायाला गुदगुल्या करणं, प्रेमचं निशाची वेणी ओढणं; हॉस्पिटलमध्ये प्रेमचं निशाला अभिंनदन करणं, या सगळ्यातून प्रेम आणि निशामध्ये कुछ तो गडबड़ है दया हे शेंबडं पोर देखील ओळखेल. पण टफीने चुकीच्या पत्त्यावर कुरियर केलेल्या निशाच्या पत्राला वाचून सर्वांला दे धक्का काहून बसतो...!!!
ते सर्व काय पन असो...
दिल की धड़कन माधुरीचा "हम आपके हैं कौन..!!" सुप्परच भारी होता राव...
@ अनिकेत परशुराम आपटे.
No comments:
Post a Comment