मल्टीस्टारर म्यूझिकल ट्रीट...

पेश है... तीन भाइयों के बिछड़ने और मिलने की सौगात... सनिमा का नाम है, "यादों की बारात..."

शंकर, विजय आणि रतन असे तीन भाऊ, शाकाल (अजीत खान) नामक गुंडाने केलेला आपल्या आई-वडिलांचा खून पाहून पळ काढतात. तिघंही वेगळे होत वेगवेगळ्या ठिकाणी मोठे होतात. शंकर (धर्मेंद्र) एक चोर बनतो, विजय (विजय अरोरा) एका गरीब घरात वाढतो आणि रतन ऊर्फ माँटो (तारिक़ खान) एका हॉटेलमध्ये गायक असतो. तिघंही भाऊ एकमेकांसमोर येत राहतात पण एकमेकांना ओळखू शकत नाहीत. अखेर शाकालच्याच कृपेने (हॉटेल त्याचंच असतं...) तिघं पुन्हा भेटतात शाकालसह सर्व गुंडांचा खात्मा करतात...

सलीम खान व जावेद अख़्तर म्हणजेच सलीम-जावेद या जोडीने लिहिलेली ही कथा म्हणजे मल्टीस्टारर मसाला चित्रपटांची नांदीच होती. अरे हो, चित्रपटातल्या हिरवीन राहिल्याच की... तर, त्या कामी वर्णी लागली झीनत अमान, नीतू सिंह आणि अर्चना यांची. तीन-तीन अभिनेत्री असताना, सर्वात मोठा दंगा होता झीनत अमानचा. म्हणजे चित्रपटातली बहुतांश गाणी, विजयसह झाडांभोवती पिंगा घालणं, रोमांचिक प्रसंग व गाण्यांमधून समोर येणं, किडण्याप होऊन दुश्मनच्या अड्ड्यावर पोहोचणं, शेवटच्या फायटिंगमध्ये भाग घेणं, या सर्वात झीनत अमानचाच नंबर लागला होता. याउलट नीतू सिंह व अर्चना चित्रपटात असून नसल्यागत वाटत होत्या...

नायकांच्या बाबतीत जरा वेगळा प्रकार दिसला. हाणामारी व साहसदृष्यांची बाजू धर्मेंद्रने सांभाळली तर रोमँससाठी विजय अरोराचा नंबर लागला. बिचाऱ्या नवोदीत तारीक़ खानला गीटार वाजवणं, गाणी म्हणणं आणि शेवटी थोडीफार मारामारी करणं, याखेरीज वेगळी अशी श्टोरी दिलेली दिसत नाही. "मैं तेरे नापाक खून से अपने हाथ नहीं रंगूँगा..." अशा काही संवादांखेरीज चित्रपटाचा सर्वात मोठा USP होता चित्रपटातली अप्रतीम गाणी. "आपके कमरे में कोई रहता है..." हे गाणं फारसं रुचलं नाही मला पण, "लेकर हम दिवाना दिल...", "ओ मेरी सोनी... मेरी तमन्ना...", "चुरा लिया है तुमने जो दिल को..." ही गाणी अत्यंत श्रवणीय आहेत...

चित्रपटात दोन वेळा येणारं, "यादों की बारात निकली है आज..." हे गाणं तर अनेकांच्या प्लेलिस्टमध्ये असेल. माझ्यातर नक्कीच आहे. लता मंगेशकर, पद्मिनी कोल्हापुरे आणि सुष्मा श्रेष्ठ यांनी गायलेल्या चित्रपटाच्या सुरुवातीला येणाऱ्या या गाण्यात करंगळी वर करणारं ते पिल्लू आमीर खान, पुढे जाऊन इतका मोठा स्टार होईल हे त्यावेळी कोणाला ज्ञात होतं. आमीर खानखेरीज, झीनत अमान व नीतू सिंह यांनाही या चित्रपटाने एक वेगळाच चाहतावर्ग निर्माण करून दिला आणि पुढे येणाऱ्या अनेक चित्रपटांमधून त्या नायिका म्हणून झळकत यशस्वी झाल्या...

अनेक कलावंतांची मांदियाळी असलेला आणि संगीतप्रेमींसाठी पंचमदांच्या सुमधूर गाण्यांची दिवाळी असलेला नासीर हुसैन दिग्दर्शित, "यादों की बारात" एक मल्टीस्टारर म्यूझिकल ट्रीटच म्हणावा लागेल...

@ अनिकेत परशुराम आपटे.