लव्हर बॉय क्रिश...

'डुग्गू' हे नाव ऐकल्यावर कोणाचा चेहेरा डोळ्यांसमोर येत असेल, तर तो आहे घाऱ्या डोळ्यांचा, ऊंचपुरा अभिनेता हृतिक रोशन...

त्याच्या अडखळत बोलण्यामुळे, लहानगा हृतिक बऱ्याच वेळा चेष्टेचा विषय बनायचा. अनेक वेळा त्याचे लोकांसमोर हसेही झाले. पण आपल्या जिद्दीने डुग्गूने या व्यंगावर मात तर केलीच, शिवाय एक मोठा अभिनेता म्हणूनही नावारूपाला आला...

१९८० साली प्रदर्शित झालेल्या "आशा" या चित्रपटातून अकस्मातच डुग्गू रुपेरी पडद्यावर दिसला. हृतिकचे अजोबा जे. ओमप्रकाश, "आशा" चित्रपटातल्या एका गाण्याचं चित्रिकरण करत असताना हृतिक तिथेच नाचत होता. कॅमेरा हृतिकवर येऊन स्थिरावला आणि शॉट कट न होता तसाच चालत राहिला. अशा पद्धतीने हृतिकचं रुपेरी पडद्यावर पहिलं पाऊल पडलं. पुढे "आस पास", "आपके दिवाने", "भगवान दादा" या चित्रपटांमधून एक बाल कलाकार म्हणून डुग्गू दिसला खरा, पण त्याचा खरा प्रवास अजून सुरू व्हायचा होता...

काही काळ चंदेरी दुनियेपासून लांब राहिलेला हृतिक पुन्हा परतला तो सहायक दिग्दर्शक म्हणून. हृतिकच्या वडिलांनी म्हणजे राकेश रोशनने दिग्दर्शित केलेल्या "खुदगर्ज", "किंग अंकल", "करन-अर्जून" आणि "कोयला" या चार चित्रपटांच्या सहायक दिग्दर्शनाची जबाबदारी हृतिकने सांभाळली. हृतिकने चित्रपटांत नायक म्हणून काम करावं असं सलमान खानने राकेश रोशनला सुचवलं होतं असं म्हणतात. ऊंची आणि चेहेऱ्यासोबतच हृतिकची शरीरयष्ठी सुदृढ होण्यासाठी सलमान खाननेच त्याला मार्गदर्शन केलं असंही ऐकण्यात आहे. "करन-अर्जून" प्रसारित झाल्याच्या पाच वर्षानंतर एक चांगलं कथानक घेऊन राकेश रोशन यांनी हृतिकला नायक म्हणून मोठ्या पडद्यावर आणलं...

२००० साली प्रदर्शित झालेल्या "कहो ना प्यार है" या चित्रपटामधून एक नायक म्हणून हृतिक समोर आला. त्याची दुहेरी भूमिका, देखणा चेहेरा, अप्रतीम अदाकारी, सुंदर नृत्य, कथानक, या सर्वांच्या एकत्रित ताकदीमुळे "कहो ना प्यार है"ने अफाट यश मिळवले आणि डुग्गू युवा पिढीच्या गळ्यातला ताईत बनला. काहीतरी वेगळं करण्याच्या इराद्याने केलेले "फिज़ा", "मिशन कश्मीर", "यादें" अयशस्वी ठरले आणि हृतिकची लोकप्रियता थोडी कमी झाली. पण "कभी ख़ुशी कभी ग़म" यशस्वी झाला आणि डुग्गू आघाडीच्या अभिनेत्यांच्या यादीत सामील झाला...

एकसूरी रोमँटिक भूमिका करत असताना हृतिकने दिलेले काही चित्रपट यशस्वी झाले, तर काही प्रेक्षकांच्या पसंतीतून उतरले. अशावेळी हृतिकने हाणामारी व गंभीर भूमिकांकडे मोर्चा वळवला. "बँग बँग", "अग्नीपथ", "धूम २", "जोधा-अक़बर", "गुज़ारीश", "क्रिश", "वॉर", "सूपर ३०" असे चित्रपट बऱ्यापैकी यश संपादन करताना हृतिक रोशन एक परिपक्व अभिनेता म्हणून यशस्वी होत गेला. सहायक दिग्दर्शक व अभिनेता म्हणून लोकप्रिय होत असताना हृतिकने पार्श्वगायनातही आपला गळा आजमावत, "काइट्स", "सूपर ३०" आणि "ज़िंदगी ना मिलेगी दोबारा" या चित्रपटांतून गाणीही गायली...

एक उत्तम अभिनेता, ऊंचपुरं व देखणं व्यक्तिमत्व, घारे डोळे व लहान मुलासारखं निरागस हास्य असलेल्या डुग्गूचा, अर्थात हृतिक रोशनचा आज वाढदिवस. लोकप्रियतेत वडिल राकेश रोशन यांच्याही दोन पावलं पुढे असलेल्या या लव्हरबॉय क्रिशला वाढदिवसाच्या मनापासून शुभेच्छा...

@ अनिकेत परशुराम आपटे.