"आज खुश तो बहुत होगे तुम...", "नाम, विजय | विजय दीनानाथ चौहान, पूरा नाम...", "रिश्ते में तो हम सबके बाप लगते हैं, नाम है शहनशाह...", "आय कॅन टाक इंग्लीस, आय कॅन वाक इंग्लीस, आय कॅन लाफ इंग्लीस, बिकॉज इंग्लीस इज अ फन्नी लँग्वेज..." हे संवाद रुपेरी पडद्यावर अजरामर झाले, ते इंक़िलाब हरिवंशराय श्रीवास्तव अर्थात आपल्या सर्वांचे लाडके व प्रसिद्ध अभिनेते अमिताभ बच्चन यांच्यामुळे...
स्वातंत्र्यपूर्व काळात, "इंक़िलाब ज़िदाबाद" या प्रचलित घोष वाक्याचा श्रीवास्तव कुटुंबावर इतका प्रभाव होता, की घरात जन्मलेल्या बाळाचं नावच इंक़िलाब ठेवलं गेलं. पुढे हरिवंशराय श्रीवास्तव यांचे मित्र व कवी सुमित्रानंदन पंत यांच्या सांगण्यावरून इंक़िलाब हे नाव बदलून अमिताभ ठेवलं गेलं आणि हरिवंशराय श्रीवास्तव यांनी स्वत: लेखनासाठी 'बच्चे जैसे' अर्थात बच्चन हे नाव धारण केल्यामुळे तो मुलगा अमिताभ हरिवंशराय बच्चन या नावाने ओळखला गेला...
१९६९ साली प्रदर्शित झालेल्या "सात हिंदुस्तानी" या चित्रपटाद्वारे अमिताभ बच्चन यांनी रुपेरी पडद्यावर पहिलं पाऊल ठेवलं. "आनंद", "मिली", "नमक हराम" या चित्रपटांमधून सहनायक म्हणून काम करत असताना, "ज़ंजीर" प्रदर्शित झाला आणि नायक म्हणून अमिताभ बच्चन रातोरात प्रसिद्ध झाले. इतकंच नाही, तर 'एँग्री यंग मॅन' हे टोपणनावही त्यांना मिळालं. पुढे, "कालिया", "दिवार", "कभी कभी", "नमक हलाल", "कूली", "त्रिशूल" अशा अनेक यशस्वी चित्रपटांची लांबच लांब रांग लागली...
एक नायक म्हणून चार दशकांहून अधिक काळ रुपेरी पडदा गाजवणाऱ्या अमिताभ बच्चन यांनी, "डॉन", "परवाना", "आग", "आँखें" या चित्रपटांमध्ये खलनायकी व्यक्तिरेखाही साकारल्या. त्याचसोबत, "हेरा-फेरी", "दो और दो पाँच", "चुपके चुपके", "अमर अक़बर एँथनी" अशा चित्रपटांमध्ये अमिताभ बच्चन यांच्या विनोदी भूमिकांनाही प्रेक्षकांनी उचलून धरलं. याशिवाय, "सोदागर", "शक्ति", "अभिमान", "आलाप", अशा चित्रपटांत त्यांच्या वाट्याला आलेल्या गंभीर स्वरूपाच्या भूमिकाही चांगल्याच लक्षात राहिल्या...
मधल्या काळात नायक म्हणून, "मृत्यूदाता", "इंद्रजीत", "लाल बादशाह" अशा प्रकारचे चित्रपट अमिताभ बच्चन यांनी केले. काही चित्रपट बरे चालले तर काहींकडे प्रेक्षकांनी पाठ फिरवली. अमिताभ बच्चन यांच्या कारकिर्दीला धक्का लागतो की काय असं वाटत असतानाच, "मोहब्बतें" प्रदर्शित झाला आणि नारायण शंकरच्या प्रभावशाली चरित्र व्यक्तिरेखेने अमिताभ बच्चन यांनी मेन स्ट्रीम चित्रपटांत जबरदस्त पुनरागमन केलं. त्यांच्या चरित्र भूमिकांनी नटलेले, "ब्लॅक", "वज़ीर", "अक़्स", "पा", "खाकी" प्रेक्षकांच्या पसंतीस उतरले आणि अमिताभ बच्चन यांच्या दुसऱ्या इनिंगचे अश्वही चौखूर उधळू लागले...
या दुसऱ्या इंनिंगमध्ये चरित्र नायक, चरित्र सहनायक किंवा चरित्र सहकलावंत या भूमिकांसोबत, "बावर्ची" या चित्रपटात अमिताभ बच्चन यांनी निभावलेली सूत्रधार किंवा निवेदकाची भूमिकाही, "लगान", "जोधा अक़बर", "परिणीता" या चित्रपटांद्वारे त्यांच्या वाट्याला आली. याखेरीज, "चेहरे", "बदला", "१०२ नॉट आऊट", "भूतनाथ" या चित्रपटांमधल्या अमिताभ बच्चन यांच्या वेगळ्या धाटणीच्या भूमिकांना प्रेक्षकांची चांगली पसंती मिळाली...
आज ११ ऑक्टोबर. श्री अमिताभ हरिवंशराय बच्चन यांचा जन्मदिवस. बोलके ओठ, धारदार आवाज, सुस्पष्ट उच्चार, कसदार अभिनय आणि मनमिळाऊ स्वभाव, यांमुळे आजही प्रेक्षकांच्या मनावर अधिराज्य गाजवणाऱ्या या चिरतरूण महानायकाला वाढदिवसाच्या मनापासून शुभेच्छा...
No comments:
Post a Comment