चक्रावणारा समय...

"आपकी आँख़ें तो अच्छी हैं, मगर नज़र कमजोर है..." या वाक्याचा पुरेपूर अर्थ दर्शवणारी आणि काळ व वेळ एकत्र आले की मृत्यू अटळ असतो हे दाखवणारी उत्कंठावर्धक शोधकथा म्हणजेच २००३ साली प्रदर्शित झालेला रॉबी ग्रेवालचा, "समय... When time strikes..."

ए.सी.पी. मालविका चौहान (सुष्मिता सेन) एक विधवा व दहा वर्षाच्या मुलीची, अंजलीची (बरखा मेनन) आई आणि एक कर्तव्यदक्ष पोलीस अधिकारी आहे. दिसणाऱ्या पुराव्यांच्याही पलिकडे जाऊन वेगळा विचार करणाऱ्या मालविकासमोर एक केस येते. एका मोठ्या उद्योगपतीची त्याच्याच घरात हत्या झालेली असते. No witnesses, no evidence, no weapon अशी ती perfect murder केस असूनही तिथे काही दुवे पेरलेले मालविकाला आढळतात. त्या दुव्यांचा माग काढत केसचा तपास करतानाच एका प्रसिद्ध अभिनेत्रीचा खून होतो...

मागच्या खुनाप्रमाणेच यावेळीही पुरावे सापडत नाहीत पण पुन्हा काही दुवे पेरलेले आढळतात. हे दोन्ही खून एकाच माणसाने केले असल्याचं मालविकाच्या लक्षात येतं. संशयित खुन्यापर्यंत मालविका पोहोचते खरी पण त्याचाच खून झाल्याचं दिसताच ती चक्रावते. अचानक तिला एक महत्वाचा धागा सापडतो. चौथा खून कोणाचा आणि किती वाजता होणार हे मालविकाला समजतं व खुन्याला पकडायला मालविका सज्ज होते. मालविका चौथा खून थांबवून खुन्याला पकडू शकेल का... हे चित्रपट पाहिल्यावरच समजतं...

चित्रपटात धक्कातंत्राचा सुरेख वापर केलेला दिसतो. संदीप चौटा यांनी दिलेलं पार्श्वसंगीत कथेतलं रहस्य टिकवण्यात व प्रेक्षकांची उत्कंठा वाढण्यात मोलाची भूमिका बजावतं. मालविका आणि त्या खुन्यामध्ये रंगलेला उंदरा-मांजराचा खेळ दाखवण्यासाठी पॅकमॅन या व्हिडियो गेमचा चित्रपटभर प्रभावी वापर झाला आहे. एका बाजूला मालविका त्या खेळातली एक लेव्हर हारते तिथेच दुसरीकडे तो खूनी तीच लेव्हल जिंकतो. हा प्रसंग पाहताना खूनी मालविकाच्या वरचढ आहे हे पुरेपूर जाणवतं...

चित्रपटाची अजून एक जमेची बाजू म्हणजे सुष्मिता सेन यांचा दमदार अभिनय. सुष्मिता सेन यांनी मालविका चौहान ही गंभीर व्यक्तिरेखा सुंदर वठवली आहे. बोलण्यातील ठेहराव, आवाजाची पातळी, देहबोली, या गोष्टी त्यांनी उत्तम साकारल्या आहेत. पोलीस अधिकारी आणि आई या दोघींमधला वागण्या-बोलण्यातला फरक सुश्ष्मिता सेन यांनी छान दर्शवला आहे. एक कडक पोलीस अधिकारी आणि शिस्तप्रिय पण प्रेमळ आई या दोन्ही व्यक्तिरेखा सुष्मिता सेन यांनी चोख वठवल्या आहेत. त्यांच्याखेरीज सुशांत सिंह, तुषार दळवी, राजेश खेरा, दिनेश लांबा या कलावंतांनीही सहायक व्यक्तिरेखेत सुष्मिता सेनची उत्तम साथ दिली आहे...

एकंदरीत, पुढे काय होईल याची उत्सूकता पदोपदी शिगेला पोहोचवणारा आणि अखेरच्या क्षणी कथा वेगळ्याच वळणावर नेणारा रॉबी ग्रेवालचा "समय... When time strikes..." हा चित्रपट आवर्जून पहावा असाच आहे...

@ अनिकेत परशुराम आपटे.